Luk 12 | PltULB | STEP | Tamin’izany, rehefa niara-niangona ny vahoaka an’arivony maro, maro loatra hany ka nifanitsa-kitro izy ireo, voalohany indrindra dia nanomboka niteny tamin’ireo mpianany Izy hoe: ‘’Tandremo ny masirasiran’ireo Fariseo, izay fiatsarambelatsihy.

Luke 12

1 Tamin’izany, rehefa niara-niangona ny vahoaka an’arivony maro, maro loatra hany ka nifanitsa-kitro izy ireo, voalohany indrindra dia nanomboka niteny tamin’ireo mpianany Izy hoe: ‘’Tandremo ny masirasiran’ireo Fariseo, izay fiatsarambelatsihy.

2 Fa tsy misy takona izay tsy haseho, ary tsy misy miafina izay tsy ho fantatra. 3 Ka na inona na inona nolazainareo tao amin’ny haizina dia ho re ao amin’ny fahazavana, ary izay nolazainareo teo an-tsofina tao anaty efitrano dia hambara eny an-tampon-trano.

4 Milaza aminareo Aho ry namako, aza matahotra ireo izay mamono ny tena, ary aorian’izany dia tsy misy na inona na inona azony atao intsony. 5 Fa hampitandrina anareo Aho ny amin’izay hatahorana. Matahora ilay Iray izay, izay rehefa avy mamono, dia manana ny fahefana ny hanary anareo any amin’ny helo. Eny, miteny aminareo aho, matahora Azy.

6 Tsy amidy farantsa kely roa ve ny tsintsina dimy? Kanefa tsy misy iray amin’ireny izay adino eo imason’Andriamanitra. 7 Fa na ny volon-dohanareo aza dia voaisa avokoa. Aza matahotra. Fa manan-danja mihoatra nohon’ny tsintsina maro ianareo.

8 Hoy Aho aminareo, izay rehetra manaiky Ahy eo anatrehan’ny olona, ny Zanak’Olona ihany koa dia hanaiky azy eo anatrehan’ireo anjelin’Andriamanitra, 9 fa izay mandà Ahy eo anatrehan’ny olona dia ho lavina eo anatrehan’ireo anjelin’Andriamanitra. 10 Izay rehetra miteny manohitra ny Zanak’Olona, dia ho avela aminy izany, fa izay rehetra miteny ratsy manohitra ny Fanahy Masina kosa, dia tsy ho voavela izany.

11 Rehefa mitondra anareo eo anatrehen’ny synagoga, ireo mpanapaka, sy ireo manam-pahefana izy ireo, dia aza manahy ny amin’izay ho fomba fiteninareo ho fiarovan-tenanareo, na izay ho lazainareo, 12 satria ny Fanahy Masina no hampianatra anareo izay tokony ho lazainareo amin’izany ora izany.‘’

13 Avy eo nisy olona iray avy tao amin’ireo vahoaka niteny taminy hoe: “Ry mpampianatra, teneno ny rahalahiko mba hizara ny lova amiko.” 14 Jesosy niteny taminy hoe: “Ralehilahy, iza no nanao Ahy ho mpitsara na mpanelanelana anareo?” 15 Hoy Izy tamin’izy ireo hoe: “Miambena mba hihazonanareo ny tenanareo lavitra ireo fanirian-dratsy rehetra, satria ny fiainan’olona iray dia tsy miankina amin’ny fitobaky ny fananany.”

16 Avy eo Jesosy nanao fanoharana iray tamin’izy ireo, nanao hoe: “Namokatra be ny sahan’ny lehilahy mpanankarena iray, 17 ary nanontany tena izy, niteny hoe: ‘Inona no ho ataoko, fa tsy manana toerana hitahirizana ireo vokatro aho?’ 18 Hoy izy hoe: ‘Izao no ho ataoko. Hazerako ireo trano fitoeram-bokatro dia hanangana lehibe kokoa aho, ary ao amin’ireo no hanangonako ny voako sy ireo vokatra hafa. 19 Dia hiteny amin’ny fanahiko aho hoe: “Ry fanahy, ianao dia manana vokatra betsaka voatahiry ho amin’ny taona maro. Mitsahara tsara, mihinàna, misotroa, mifalia.’”

20 Fa Andriamanitra niteny taminy hoe: ‘Ralehilahy adala, androany alina ny fanahinao no halaina aminao, ka ireo zavatra izay nomaninao, ho an’iza ireo?’ 21 Izany ny olona izay manangona harena ho an’ny tenany ary tsy manan-karena manoloana an’Andriamanitra.”

22 Jesosy niteny tamin’ireo mpianany hoe: “Noho izany dia lazaiko aminareo, aza manahy ny amin’ny ainareo- izay ho haninareo, na ny momban’ny tenanareo- izay ho tafinareo. 23 Fa ny aina dia mihoatra noho ny sakafo, ary ny tena dia mihoatra noho ireo fitafiana.

24 Hevero ny goaika, tsy mamafy ireny na mijinja. Tsy manana fitoeram-bokatra ireny na trano fitahirizana, kanefa omen’Andriamanitra hanina ireny. Tahaka ny ahoana ny fihoaranareo lanja mihoatra noho ireo vorona! 25 Iza aminareo no afaka manampy hakiho iray ny andro iainany amin’ny fanahiana? 26 Koa raha izany zavatra kely indrindra izany aza tsy ainareo atao, nahoana ianareo no miahiahy ny amin’ny sisa?

27 Hevero ireo lilia_ manao ahoana ny faniriny. Tsy miasa izy ireny, na mamoly. Kanefa lazaiko aminareo, na Solomona tamin’ny voninahiny manontolo aza tsy nitafy tahaka ny iray tamin’ireny. 28 Raha tafian’Andriamanitra tahaka izany ireo ahitra eny an-tsaha, izay eo androany, ary ny ampitso dia ariana anaty fatana, toy ny ahoana ny hanafiany anareo mihoatra lavitra noho izany, ianareo ry kely finoana o!

29 Aza mitady izay ho haninareo sy izay ho sotroinareo, ary aza miahiahy. 30 Fa ireo firenena rehetra eto amin’izao tontolo izao ireo dia mitady ireny zavatra ireny, ary fantatry ny Rainareo fa mila ireny ianareo.

31 Fa katsaho ny fanjakany, dia homena ho fanampiny ho anareo ireny zavatra ireny. 32 Aza matahotra, ry andian’ondry vitsy, satria ny Rainareo dia tena faly ny hanome anareo ny fanjakana.

33 Amidio ireo fanananareo ary omeo ny mahantra. Manaova fitoeram-bola ho an’ny tenanareo izay tsy mety ho tonta_ harena any an-danitra izay tsy mety lany, izay tsy misy mpangalatra manakaiky, ary tsy misy kalalao manimba. 34 Fa any amin’izay hitoeran’ny harenareo, dia ho any ihany koa ny fonareo.

35 Aoka ny akanjo lavanareo ho hasikinareo ny valahanareo, ary aoka ny jironareo hirehitra hatrany, 36 ary manaova tahaka ireo olona izay miandry ireo tompony hiverina avy any amin’ny lanonam-pampakaram-bady, mba rehefa tonga izy ka mandondona, dia ho afaka hanokatra ny varavarana ho azy avy hatrany izy ireo.

37 Sambatra ireo mpanompo, izay hitan’ny tompony fa niambina rehefa tonga izy. Lazaiko marina aminareo, fa hisikina ny lamba lavany amin’ny valahany izy, ary hampipetraka azy ireo eo an-databatra, ka ho avy izy ary hanompo azy ireo. 38 Raha ho avy amin’ny ora faharoa amin’ny alina ny tompo, na amin’ny ora fahatelo aza, ka mahita azy ireo vonona, dia ho sambatra ireo mpanompo ireo.

39 Ho fanampin’izany dia fantaro izao, fa raha fantatry ny tompon-trano ny ora hatongavan’ny mpangalatra, dia tsy namela ny tranony ho vakiana izy. 40 Mivonòna ihany koa, fa tsy fantatrareo ny ora hiavian’ny Zanak’Olona.”

41 Petera niteny hoe: “Tompo ô, aminay ihany ve no itenenanao izany fanoharana izany, sa amin’ny olon-drehetra ihany koa?” 42 Ny Tompo niteny hoe: “Iza ary no mpitantana mahatoky sy hendry izay ho tendren’ny tompony ho ambonin’ireo mpanompony hafa mba hanome azy ireo ny anjara hanin’izy ireo amin’ny fotoana mety? 43 Sambatra izany mpanompo izany, izay hitan’ny tompony manao izany rehefa tonga izy. 44 Lazaiko marina aminareo fa ho tendreny hanapaka ny fananany rehetra izy.

45 Fa raha miteny ao am-pony izany mpanompo izany hoe: ‘Nahemotry ny tompoko ny fiverenany,’ ka manomboka mamono ireo mpanompo lahy sy vavy, ary mihinana sy misotro, ka lasa mamo, 46 ny tompon’izany mpanompo izany dia ho avy amin’ny andro tsy ampoiziny, ary amin’ny ora tsy fantany, ary hanapatapaka azy ka hanomana toerana ho azy miaraka amin’ireo tsy mahatoky.

47 Izany mpanompo izany, nahafantatra ny sitrapon’ny tompony, kanefa tsy niomana na nanao araka ny sitrapony, dia ho kapohina amin’ny fikapohana maro. 48 Fa izay tsy nahafantatra ary nanao izay mendrika ahazoana kapoka kosa, dia ho kapohina amin’ny fikapohana kely. Fa ireo rehetra izay nomena be, dia ho be kokoa no ho takiana aminy, ary ireo izay nanankinana be, dia ho be lavitra aza no hangatahina aminy.

49 Tonga Aho hanipy afo eny ambonin’ny tany, ary toy ny ahoana ny faniriako mba hirehetan’izany sahady. 50 Fa manana fanaovam-batisa mba hanaovana batisa aho, ary toy ny ahoana ny fahoriako mandra-pahatanterak’izany!

51 Mihevitra ve ianareo fa tonga Aho mba hitondra fiadanana eto an-tany? Tsia, milaza aminareo aho, fa fisarahana aza. 52 Manomboka izao dia hisy dimy ao amin’ny trano iray izay hisaratsaraka_ olona telo manohitra ny roa, ary olona roa manohitra ny telo. 53 Hisaratsaraka izy ireo, ny ray hanohitra ny zanaka lahy, ary ny zanaka lahy hanohitra ny ray; ny reny hanohitra ny zanaka vavy ary ny zanaka vavy hanohitra ny reny; ny rafozam-bavy hanohitra ny vinanto vavy, ary ny vinanto vavy hanohitra ny rafozam-bavy.”

54 Niteny tamin’ireo vahoaka koa Jesosy hoe: “Rehefa mahita rahona miforona eny andrefana ianareo, dia hoy avy hatrany ianareo hoe: ‘Hisy ranon’orana ho avy,’ ary dia mitranga izany. 55 Rehefa misy rivotra mitsoka avy any atsimo, dia hoy ianareo hoe: ‘Hisy hafanana be ho avy,’ ary mitranga izany. 56 Ry mpihatsaravelatsihy, hainareo ny mandika ny toetoetry ny tany sy ny lanitra, fa ahoana no tsy ahaizanareo mamantatra izao andro ankehitriny izao?

57 Nahoana ianareo no tsy mitsara izay marina ho an’ny tenanareo? 58 Fa rehefa mandeha miaraka amin’ny mpifanandrina aminareo eo anatrehan’ny mpitsara ambony ianareo, eny an-dàlana dia miezaha handamina ny olana miaraka aminy mba tsy handehanany handrirotra anareo eo amin’ny mpitsara, ary mba tsy hanoloran’ny mpitsara anareo any amin’ny mpamatotra, ary mba tsy handefasan’ny mpamatotra anareo any am-ponja. Hoy aho aminareo, tsy ho tafavoaka ao mihitsy ianareo mandra-pandoanareo ny vola farany izay madinika indrindra.”